Assalamu'alaikum warahmatullah,
Jaroe dua blah ateuh jeumala,
Cukop that mameh panton nasehah,
Cukop jeurelah peunoh ngen makna
Sikrek dua ija talimbot,
Dalam seupot tajak leung tika,
Tanyoe peu jioh nyang han patoet,
Nyang keuh yg geudhot dalam agama,
Keu peu na pade menyoe tan asoe,
Kepeu bak panjou gapeuh jih hana,
Kepeu na aneuk metan ilme adoe,
O'h akhe dudou jeut kebeulaga.
Loen jok sikula gata di gamopong,
O'h wate raya ta intat u Banda,
ingat hai Aneuk Poma digampong,
bek gata hura-hura sideh di kota
Menyoe keuh keubiet gata jak kuliah,
Beu jeumot langkah ubak pustaka,
Bek sampe malee IAIN dan UNSYIAH,
Capah blahdeh seulawah katan le harga.
Ingat ureung chik lam reuoh reuah,
Geujak tueung upah bah ureung kaya,
Na cit yg ladom jak direh geutah,
Ladom na mudah kaya ngen harta.
Teuma dum jinoe takalon jelas,
Dara meutuah dum ka binasa,
Njang aneuk muda bek lon peugah,
Gadoh peutimang gah inoe di banda.
Yang cukop aneh bak mahasiswi,
Baro meuturi ka papa-mama,
Yang leubeh parah aneuk miet tari,
Dada tan isi ka ayah bunda.
Meunan piasan takalon bukti,
Dum muda mudi mabok lam cinta,
Geukheun pacaran cinta geu bukti,
Ka meukap bibi nikah goh lom na.
Saleum Meutuah.
